Category: Afrikaanse eboeke

Eugene de Kock: Sluipmoordenaar van die staat

http://myafrikaans.com/eugene-de-kock-sluipmoordenaar-van-die-staat.html

Eugene de Kock het die bloed van tientalle mense aan sy hande.

Vir die meeste Suid-Afrikaners is hy die “monster” van Vlakplaas. Tog was Anemari Jansen gefassineer toe sy hom in 2011 vir die eerste keer in Pretoria-Sentraal ontmoet. Hoe versoen sy die man “met die sagte stem” met die mens wat Prime Evil gedoop is?

Jansen se soeke na antwoorde het haar na alle uithoeke van die land geneem, na De Kock se familie, vriende en oud-Koevoet- en Vlakplaaskollegas, wat talle ontboesemings teenoor haar gemaak het. Sy haal ook groot dele aan uit De Kock se dagboeke en ‘n ongepubliseerde tronkmanuskrip. In sy eie woorde is De Kock skreiend eerlik: oor sy wandade, oor sy opdraggewers – en oor sy berou. Dié boek skets ‘n prentjie van ‘n intelligente, komplekse mens. Dit belig nie net De Kock se keuses nie, maar ook die onlangse Suid-Afrikaanse verlede op ‘n openbarende, soms skokkende manier.

via Eugene de Kock: Sluipmoordenaar van die staat.

via Eugene de Kock: Sluipmoordenaar van die staat.

Nuus – Uittreksel uit Die Oshikuku Insident

Die plakkaat hang skeef teen ’n lamppaal voor die hofgebou.

Hein stap agter Helga teen die trappe op en kyk na die swart en wit foto van sy pa. Onder sy gesig het iemand ‘n stokkieslyf met ‘n viltpen ingeteken. Bloed drup van sy vingerpunte af. ‘n Hitler snor pryk op sy bolip.

Hy en Helga het nie kans gekry om te praat sedert sy gister saam met sy ouers en André opgevlieg het nie. Hy het gehoor Botha is steeds soek. Die polisie reken hy kan landuit wees. Hein het haar e-pos uit sy kop gesit. Daar is nie meer tyd om weer deur die hele proses te worstel. Sy keuse is gemaak. Dis te laat vir omdraai.

Polisiemanne met oproerhelms en lang knuppels beman die spasie tussen die twee groepe oproerige ondersteuners. Vier mense hou ’n rooi banier vas met die woorde.

‘Shoot the Racist Bastard’

Die skare aan weerskante van die lemmetjiesdraad strek tot verby die volgende straatblok. Kaptein Smit se vyande beskou sy versuim om homself te verdedig as ’n skulderkenning en hulle soek wraak. In die oë van sy ondersteuners is hy ’n martelaar, uitgelewer aan die genade van dieselfde regstelsel wat toegelaat het dat Shabir Shaik sy tronkstraf op die gholfbaan deurbring.

In die dagblaaie is wild bespiegel oor die motief agter die besluit. Een joernalis glo die bewerings is so verregaande en ongegrond, dat ‘n verweer oorbodig is. Ander soek die antwoord in Steve Smit se karakter. Hier is ’n man wat nie bereid is om die skuld op ander te pak om sy eie bas te red nie. ’n Les vir ons almal in hierdie tye waarin mense nie meer die morele moed het om verantwoordelikheid vir hulle dade te aanvaar nie.

André se hand op sy skouer onderbreek sy gedagtes. “Waar is Gagiano?” Sy stem skaars hoorbaar bo die lawaai in die straat toe die skare van kaptein Smit se teenwoordigheid bewus raak.

Hein leun nader. “Joubert het hom vroeër ingebring. Die landdros wou hom eers sien.” “Wat sê Geoff Lord?” vra André.

“Kon hom nie weer in die hande kry nie. Sy laaste storie was dat die landdros van die Streekshof ’n spesiale vergunning sal moet maak vir Gagiano om te getuig. Ek hoop hulle het reggekom. As Gagiano agterkom ons het vir hom gelieg oor die polisie, gaan ons hom nooit weer sien nie.”

http://myafrikaans.com/die-oshikuku-insident.html

via Nuus – Uittreksel uit Die Oshikuku Insident.

 

Nuus – Takelwerk deur Daniel Hugo #eBoek

http://myafrikaans.com/takelwerk.html

Resensie: Joan Hambidge

uit netwerk24

Die titel aktiveer immers reeds die klassieke Opperman-gedig “Digter”:

Ek is gevang

en met die stryd

êrens in die ewigheid

op ’n Ceylon verban

waar al my drange

na ’n verlore vaderland

my dag na dag geëiland

hou met horisonne en verlange,

en in die geel gloed van die kers

snags deur die smal poort

van die wonder elke woord

laat skik tot klein stellasies vers

wat groei tot boeg en mas

en takelwerk – en die uiteindelike

reis met die klein skip

geslote agter glas.

via Nuus – Takelwerk deur Daniel Hugo #eBoek.

via Nuus – Takelwerk deur Daniel Hugo #eBoek.

In ritme met God (eBoek)

Wat maak jou wie jy werklik is? So baie jong mans soek vandag hul identiteit in die wêreld. Maar die wêreld verander elke dag – God is die enigste standvastige baken.

Heinz Winckler glo jou identiteit in Jesus staan uit as een van die belangrikste aspekte van jou lewe. As jy weet wie jy in Hom is, kan jy jou roeping vind en uitleef, en deel word van ’n generasie wat God se koninkryk uitbou.

IN RITME MET GOD begin met ’n soeke na wie ons drie-enige God is, en daarna kyk Heinz na wie Jesus en Paulus gesê het jy is. Daaruit vloei die soeke na elke mens se roeping binne die koninkryk voort. Die boek sluit af met ʼn praktiese uitdaging en inspirerende gebed aan die einde van elke hoofstuk.

IN RITME MET GOD is Heinz se persoonlike getuienis van hoe God hom gelei het tot waar hy vandag is. Hy wil ander inspireer en aanmoedig om hul soeke na God ook hul eerste prioriteit te maak. Die boek word afgerond met twee liedjies, spesiaal geskryf vir die vrystelling van hierdie boek, wat gratis afgelaai kan word vanaf http://www.cumuitgewers.co.za.

via In ritme met God (eBoek).

 

Nuus oor eBoeke

Aangesien eBoeke en e-lees nog so nuut is in Suid-Afrika is daar nie werklik betroubare data beskikbaar oor waarop lesers eBoeke lees nie.

http://myafrikaans.com/e-boeke.html

Dit is interessant om te kyk wat die neiging in Amerika is. Volgens die Pew Research ondersoek is die mees gewilde toestel om eBoeke te lees vir die 16-29 ouderdomsgroep, ‘n persoonlike rekenaar of  ‘n skootrekenaar. Selfs vir die 30+ ouderdomsgroep is ‘n rekenaar of ‘n skootrekenaar tweede keuse. Hierdie ondersoek sluit e-lees vir werk en studie doeleindes in. Om op ‘n slimfoon te lees was die tweede gewildste toestel om eBoeke te lees, veral by jong volwassenes. Meer as ‘n kwart van die deelnemers in die ondersoek het ‘n eBoek die afgelope 12 maande gelees.

In die ouderdomsgroep 12-29 is eBoeke die mees gewildste by naskoolse studente. Vir eBoeke om werklik pos te vat in Suid-Afrika moet digitale inhoud gemik wees op die digitale toestel van keuse van jongmense: die slimfoon. Lees hier meer oor hoe om eBoeke op ‘n slimfoon te lees.

Volgens die Pew-verslag het eBoeke in dieVSA ‘n groot invloed op die lees gewoontes van jongmense wat deesdae meer geneig is om te e-lees in hul spaartyd. Jongmense lees nou eBoeke tydens reis- en wagtye.

Die diagram hieronder gee ‘n aanduiding van die toestelle wat die ondersoekgroep die afgelope 12 maande gebruik het om eBoeke te lees.

via Nuus.

Nuus – Die vierde stem eBoek

http://myafrikaans.com/blog/stem/

François Bloemhof is bekend daarvoor dat hy aanhangers van spanningsverhale telkens gee wat hulle soek – én wat hulle nie kon verwag nie. Met Die vierde stem is dit waarder as ooit.

Die storie word vanuit meer as een perspektief vertel. Drie karakters – ’n kantoorwerker, ’n kopdokter en ’n skrywer – beïnvloed mekaar op maniere waarvan hulle onbewus is; die leser weet meer as hulle, hoewel nooit genoeg om te voorspel wat volgende kom nie…

Maar aan wie behoort die vierde stem? Waar kom sy vandaan? Watter rol speel sy in dié gebeurtenisryke intrige, en wat is haar vreeslike oplossing? Dis net ’n paar van die vrae, en die antwoorde is uitklophoue.

Aangetrokkenheid en afhanklikheid. Konflik, magspeletjies en die ou-ou stryd tussen haat en liefde. Alles in een sielkundige riller saamgebind met ’n blik op menseverhoudinge wat lesers nie aldag beskore is nie

via Nuus – Die vierde stem eBoek.

Nuus – Onvergeetlike eBoek rit – Ester

 

Uittreksel uit ‘n resensie van  Deborah Steinmair, Netwerk24

Die boek Ester is elke bibliofiel se droom: Dit kaap jou kop en aanvaar geen losprys nie. Kerneels Breytenbach se jongste roman is ’n luukse treinrit vol intrige, kinkels en wellus. Maar veral hunkering.

Veel word gesuggereer en aan die leser oorgelaat om te ontsyfer, soos die eendersheid van mense oral. Daar is lyne deur te trek na die huidige politieke bestel: ’n leier, D.F. Malan (volgens die skone Ester het hy die oë van ’n weekdier gehad), ’n man vir wie sy makkers moet lieg en konkel om sy politieke loopbaan te red ten einde hul party aan die bewind te kry. Daar is niks nuuts onder die son nie.

Wanneer dinge een aand jolig raak in die eetwa merk Ester op dat die Afrikaners presies soos Berlyners voor die oorlog kuier: “Hier’s baie drank. Nou nie Kristall nie, maar drank. Olie die masjinerie van ontvlugting. Van vergeet. Hier’s musiek.” Ikoniese volksmusikante soos Hendrik Susan, Nico Carstens en Chris Blignaut is ook op die trein: Hulle maak ’n spoggerige buiging in ’n heerlike kamee of twee.

Hierdie roman is tydloos, universeel en behoort ’n akkoord by alle lesers raak te slaan, selfs dié wat nie ʼn duit omgee vir geskiedenis, spioenasie of stoomtreine nie. Dis louter genot, soos ingevoerde sjokolade. Breytenbach is ’n meesleurende verteller en sy woorde oorrompel en verlei soos ’n beeldskone Duitse spioen. Dis tegelyk dralend en vaartbelyn. Tergend. Die suiwer vreugde wat hy ooglopend ervaar by die weef van sy web trek die leser in en herinner soms aan Etienne van Heerden.

Watter voortreflike, wêreldklasskrywers het ons nie in Afrikaans nie. Hulle, eerder as manipulerende politici en narcistiese sangers, sal die taal laat voortleef.

via Nuus – Onvergeetlike eBoek rit.

Nuus – Wenners van die kykNET-Rapport Boekpryse 2014

Die kykNET-Rapport Boekpryse het ten doel om leeslus aan te wakker deur groter erkenning en blootstelling te gee aan interessante en innoverende fiksie en feite in Afrikaans.

In die eerste bestaansjaar van die prys is 54 inskrywings ontvang.  Die keurders was verras deur romans wat die verbeelding aanvuur, wat in tema die nuwe aandurf en in taalgebruik die reikwydte van Afrikaans vergroot. Die verdieping en verbreding van ons begrip van die wêreld by die niefiksie-inskrywings het ook waardering ontlok.

Die wenners van die eerste kykNET-Rapport Boekpryse vir fiksie en niefiksie ontvang elk R200 000 en die wenner van die Filmprys R100 000.

Die wenners vir 2014 lyk soos volg:

FIKSIE

·         Wolf, Wolf, Eben Venter (Tafelberg)

NIEFIKSIE

·         Die oorlog kom huis toe, Albert Grundlingh & Bill Nasson (reds.) (Tafelberg)

FILM

·         ’n Ander mens, Zirk van den Berg (Kwela)

Die wenners is Vrydagmiddag, 21 November 2014 by ’n geselligheid in Kaapstad aangekondig.

via Nuus – Wenners van die kykNET-Rapport Boekpryse 2014.

Ester deur Kerneels Breytenbach

 

Koop die eBoek hier!

’n Meesleurende roman oor ’n verbode passie en ’n politieke intrige. Dis gebaseer op ’n werklike historiese insident, en die gevolge daarvan: Die ontmoeting in 1940 tussen Dr DF Malan en ’n Duitse spioen, mev Thyra Denk. Nou, in 1946, kry Dieter Bergman, ’n senior polisieman, instruksies om mev Denk per trein van Windhoek na Kaapstad te vergesel, waar sy voor ’n Gekose Komitee van die Parlement moet getuig. As daar bewys kan word dat Malan met die Nazi’s meegewerk het tydens die Tweede Wêreldoorlog, kan hy van hoogverraad aangekla word en sal dit die einde van sy politieke loopbaan beteken. Tydens die lang reis per trein ontstaan daar ’n verhouding tussen Bergman en die beeldskone spioen. Op die trein is egter ook ene adv Doerkstra. Sy missie: hy moet die spioen in die geheim te sien kry en haar oorrreed om nie met haar getuienis Malan se loopbaan te vernietig nie . . .

Foto’s: Izak de Vries

 

 

Ester deur Kerneels Breytenbach.